Department of Handlooms - கைத்தறி துறை

வேட்டி சேலை வழங்கும் திட்டம்

வேட்டி சேலை வழங்கும் திட்டம் தமிழக அரசினால் செயல்படுத்தப்படும் மிக சீரிய திட்டங்களில் ஒன்றாக 1983 - ஆம் ஆண்டு அறிமுகப்படுத்தப்பட்டது. மாநிலத்தில் உள்ள 14,000 கைத்தறி நெசவாளர்கள் மற்றும் 54,000 விசைத்தறி நெசவாளர்கள் ஆகியோருக்கு தொடர் வேலை வாய்ப்பு அளித்தல் மற்றும் கிராமப்புற மற்றும் நகர்ப்புறங்களில் வசிக்கும் ஏழை எளிய மக்களுக்கு ஒவ்வொரு ஆண்டும் பொங்கல் பண்டிகைக்கு சேலைகள் மற்றும் வேட்டிகள் அளித்தல் ஆகிய இரு நோக்கங்களுடன் இத்திட்டம் செயல்படுத்தப்பட்டு வருகிறது.
பள்ளி மாணாக்கர்களுக்கு விலையில்லா சீருடை வழங்கும் திட்டம்

அரசு மற்றும் அரசு உதவி பெறும் பள்ளிகளில் பயிலும் மாணாக்கர்களுக்கு ஒவ்வொரு வருடமும் விலையில்லா சீருடை வழங்கும் திட்டத்தினை அரசு செயல்படுத்தி வருகிறது. இத்திட்டத்தின் மூலம் சத்துணவுத் திட்டத்தின் கீழ் பயன் பெறும் 1-ஆம் வகுப்பு முதல் 8-ஆம் வகுப்பு வரை கல்வி பயிலும் பள்ளி மாணாக்கர்கள் பயனடைந்து வருகின்றனர். இத்திட்டத்தின்கீழ் ஆண்டொன்றுக்கு நான்கு இணைச் சீருடைகள் பள்ளி மாணாக்கர்களுக்கு வழங்கப்பட்டு வருகிறது.
கைத்தறி நெசவாளர்களுக்கு விலையில்லா மின்சாரம் வழங்குதல்

கைத்தறி நெசவாளர்களுக்கு விலையில்லா மின்சாரம் வழங்கும் திட்டம் 2006-07 முதல் தமிழ்நாடு அரசால் செயல்படுத்தப்பட்டு வருகிறது. இத்திட்டத்தின்கீழ், கைத்தறி நெசவாளர்களுக்கான விலையில்லா மின்சாரத்தை இரு மாதங்களுக்கு 200 அலகுகள் வரை அரசு வழங்கி வருகிறது. இத்திட்டத்தின்கீழ் 77,550 கைத்தறி நெசவாளர் குடும்பங்கள் பயனடைந்து வருகின்றன.
விசைத்தறி நெசவாளர்களுக்கு விலையில்லா மற்றும் மானியத்துடன் மின்சாரம் வழங்குதல்

விசைத்தறி நெசவாளர்களுக்கு விலையில்லா மின்சாரம் வழங்கும் திட்டம் 2006-07 முதல் தமிழ்நாடு அரசால் செயல்படுத்தப்பட்டு வருகிறது. இத்திட்டத்தின் கீழ், விசைத்தறி நெசவாளர்களுக்கான விலையில்லா மின்சாரத்தை இரு மாதங்களுக்கு 750 அலகுகள் வரை அரசு வழங்கி வருகிறது. இத்திட்டத்தின் கீழ் 1,42,227 விசைத்தறி நெசவாளர்கள் பயனடைந்து வருகின்றனர்.
தள்ளுபடி மானியத் திட்டம்

கைத்தறித் துணிகளை விசைத்தறி மற்றும் ஆலை துணிகளுடன் போட்டியிட்டு சந்தையில் விற்பனை செய்ய உதவும் வகையில் கைத்தறித் துணிகளின் விற்பனைக்கு மாநில அரசு தள்ளுபடி மானியம் வழங்கும் திட்டத்தினை செயல்படுத்தி வருகிறது. இத்திட்டம் தொடக்கக் கைத்தறி நெசவாளர் கூட்டுறவு சங்கங்கள் மற்றும் தமிழ்நாடு கைத்தறி நெசவாளர் கூட்டுறவு சங்கத்தால் (கோ-ஆப்டெக்ஸ்) விற்பனை செய்யப்படும் கைத்தறித் துணிகளை சந்தைப்படுத்தவும் அவற்றின் இருப்பினைக் குறைக்கவும் உதவுகிறது.

மேற்கண்ட சங்கங்களால் விற்பனை செய்யப்படும் கைத்தறித் துணிகளின் சில்லறை விற்பனை மற்றும் மொத்த விற்பனைக்கு ஆண்டு முழுவதும் 20 விழுக்காடு தள்ளுபடி மானியம் இத்திட்டத்தின் கீழ் அரசால் வழங்கப்பட்டு வருகிறது. பருத்தி இரகங்களுக்கு உருப்படி ஒன்றுக்கு ரூ.100/- அல்லது 20 விழுக்காடு, இதில் எது குறைவோ, அத்தொகை, அதே போன்று, பட்டு துணிகளுக்கு உருப்படி ஒன்றுக்கு ரூ.200/- அல்லது 20 விழுக்காடு, இதில் எது குறைவோ, அத்தொகை என்ற வரையறைக்குட்பட்டு தள்ளுபடி மானியம் வழங்கப்படுகிறது

இது தவிர பேரறிஞர் அண்ணா பிறந்த நாளை முன்னிட்டு வாடிக்கையாளர்களுக்கு விற்பனையின் வழக்கமாக வழங்கப்படும் 20 விழுக்காடு தள்ளுபடியுடன் கூடுதலாக 10 விழுக்காடு சிறப்பு தள்ளுபடியும் சேர்த்து, 30 விழுக்காடு மானியத்தை செப்டம்பர் 15-ஆம் தேதி முதல் ஜனவரி 31-ஆம் தேதி வரை 139 நாட்களுக்கு வழங்கிட ஒவ்வொரு ஆண்டும் அரசால் அனுமதி அளிக்கப்படுகிறது. இச்சிறப்புத் தள்ளுபடி மானியத் திட்டத்தின் கீழ் பருத்தி துணி வகைகளுக்கு உருப்படி ஒன்றுக்கு 30 விழுக்காடு அல்லது ரூ.150/- மற்றும் பட்டு துணி வகைகளுக்கு உருப்படி ஒன்றுக்கு 30 விழுக்காடு அல்லது ரூ.300/- இதில் எது குறைவோ அத்தொகை தள்ளுபடி மானியமாக வழங்கப்படுகிறது.
வட்டி மானியத் திட்டம்

தொடக்க கைத்தறி நெசவாளர் கூட்டுறவு சங்கங்கள், தங்களுக்குத் தேவையான நடைமுறை மூலதனக் கடன்களை தகுதிக்குட்பட்டு, மாவட்ட மத்திய கூட்டுறவு வங்கிகள் மூலம் நபார்டு வங்கியின் மறு நிதியுதவித் திட்டத்தின் கீழ் காசுக் கடனாகப் பெற்று வருகின்றன. கைத்தறி நெசவாளர் கூட்டுறவு சங்கங்கள், காசுக்கடனுக்குச் செலுத்த வேண்டிய வட்டிச் சுமையினைக் குறைக்கும் நோக்கத்திலும், கைத்தறி நெசவாளர்களுக்கு தொடர்ந்து வேலை வாய்ப்பு வழங்கவும், வட்டி மானியத் திட்டம் அரசால் செயல்படுத்தப்பட்டு வருகிறது.

இத்திட்டத்தின் கீழ் தொடக்கக் கைத்தறி நெசவாளர் கூட்டுறவு சங்கங்களின் காசுக்கடன் வசதிக்காக, மாவட்ட மத்திய கூட்டுறவு வங்கிகளால் நிர்ணயிக்கப்படும் வட்டி விகிதத்தில் 6 விழுக்காடு வட்டித் தொகை மானியமாக அரசால் திரும்ப வழங்கப்பட்டு வருகிறது.
கைத்தறி ஆதரவுத் திட்டம்

கைத்தறிப் பிரிவில் புதுமையினை புகுத்தி இரகங்கள் மாற்ற நிதி உதவி வழங்கும் பொருட்டு கைத்தறி ஆதரவுத் திட்டம்ஏற்படுத்தப்பட்டது.
நெசவாளர் நல்வாழ்வு மற்றும் காப்பீடு திட்டங்கள்

கைத்தறி நெசவாளர்களின் சமூக-பொருளாதார நிலையை மேம்படுத்தும் நோக்கில், பின்வரும் நலத்திட்டங்களை தமிழ்நாடு அரசு செயல்படுத்தி வருகிறது.
தமிழ்நாடு கூட்டுறவு கைத்தறி நெசவாளர் சேமிப்பு மற்றும் பாதுகாப்புத் திட்டம்

கைத்தறி நெசவாளர்களிடையே சேமிப்புப் பழக்கத்தை ஊக்குவிக்கவும், அவர்களது எதிர்கால வாழ்க்கைக்கு பாதுகாப்பு அளிக்கவும், தமிழக அரசானது, 1975 ஆம் ஆண்டு முதல், தமிழ்நாடு கூட்டுறவு கைத்தறி நெசவாளர் சேமிப்பு மற்றும் பாதுகாப்புத் திட்டத்தை செயல்படுத்தி வருகின்றது.

இத்திட்டத்தின்கீழ், நெசவாளர் கூட்டுறவு சங்கங்களில் உறுப்பினர்களாக உள்ள நெசவாளர்கள் தாம் ஈட்டும் கூலியில் ஒரு ரூபாய்க்கு எட்டு பைசா வீதம் செலுத்தி வருகின்றனர். அதற்கு ஈடாக, மாநில அரசு தனது பங்காக, நெசவாளர்கள் ஈட்டும் கூலியில், ஒரு ரூபாய்க்கு 8 பைசா வீதம் வழங்குகிறது. நெசவாளர்களால் செலுத்தப்பெறும் சந்தா மற்றும் அதற்கு ஈடாக மாநில அரசால் செலுத்தப்பெறும் சந்தா ஆகிய இரண்டு தொகைகளும் அதற்கான அரசுக் கணக்கில் வைப்பீடு செய்யப்பட்டு வருகிறது.

தமிழ்நாடு கூட்டுறவு கைத்தறி நெசவாளர் சேமிப்பு மற்றும் பாதுகாப்பு திட்டக்கணக்கிலுள்ள இருப்பு தொகைக்கு மாநில அரசு 6.50 விழுக்காடு வட்டி வழங்குகிறது.
தமிழ்நாடு கூட்டுறவு கைத்தறி நெசவாளர் முதியோர் ஓய்வூதியத் திட்டம்

மாநில அரசு, கூட்டுறவு அமைப்பில் உள்ள கைத்தறி நெசவாளர்களுக்காக தமிழ்நாடு கூட்டுறவு கைத்தறி நெசவாளர் முதியோர் ஓய்வூதிய திட்டத்தை 1997 ஆம் ஆண்டு முதல் செயல்படுத்தி வருகிறது. தமிழ்நாடு கூட்டுறவு கைத்தறி நெசவாளர் சேமிப்பு மற்றும் பாதுகாப்புத் திட்டத்தில் உறுப்பினராக உள்ள நெசவாளர்கள், 60 வயது எய்தும்போது தமிழ்நாடு கூட்டுறவு கைத்தறி நெசவாளர் முதியோர் ஓய்வூதியம் பெறத் தகுதி பெறுகின்றனர். கைத்தறி நெசவாளர்களுக்கு மாதந்தோறும் முதியோர் ஓய்வூதியமாக ரூ. 1000 /- வழங்கப்பட்டு வருகிறது. இத்திட்டத்தின்கீழ், தற்போது 26,996 கைத்தறி நெசவாளர்கள் முதியோர் ஓய்வூதியம் பெற்று வருகின்றனர்.
தமிழ்நாடு கூட்டுறவு கைத்தறி நெசவாளர் குடும்ப ஓய்வூதியத் திட்டம்

காலஞ்சென்ற கைத்தறி நெசவாளர்களின் குடும்பங்கள் பயன்பெறும் பொருட்டு, தமிழக அரசு தமிழ்நாடு கூட்டுறவு கைத்தறி நெசவாளர் குடும்ப ஓய்வூதியத் திட்டத்தினை செயல்படுத்தி வருகிறது.

குடும்ப ஓய்வூதிய திட்டத்தில் தங்களை இணைத்துக் கொண்டுள்ள கைத்தறி நெசவாளர்கள் 60 வயதினை எய்துவதற்குள் இறக்க நேரிட்டால், நெசவாளரின் நியமனதாரர், 10 ஆண்டுகள் வரையிலோ அல்லது மேற்படி நெசவாளர் உயிருடன் இருந்திருந்தால் 60 வயது எய்தக் கூடிய காலம் வரையிலோ, இதில் நெசவாளரின் குடும்பத்திற்கு எது அதிக பயனளிக்குமோ அவ்வகையில் நெசவாளரின் நியமனதாரருக்கு மாதந்தோறும் ரூ. 1000 /- குடும்ப ஓய்வூதியமாக வழங்கப்படுகிறது.

கைத்தறி நெசவாளர் காப்பீட்டுத் திட்டங்கள்

பிரதம மந்திரி ஜீவன் ஜோதி பீமா யோஜனா, பிரதம மந்திரி சுரக்‌ஷா பீமா யோஜனா

18 வயது முதல் 50 வயது வரை உள்ள கூட்டுறவு அமைப்பின் கீழ் உறுப்பினர்களாக உள்ள நெசவாளர்கள், கூட்டுறவு அமைப்புசாரா நெசவாளர்கள் மற்றும் உபதொழில் புரிபவர்கள், பிரதம மந்திரி ஜீவன் ஜோதி பீமா யோஜனா மற்றும் பிரதம மந்திரி சுரக்‌ஷா பீமா யோஜனா ஆகிய இரு திட்டங்களின் கீழ் உறுப்பினர்களாக சேர்க்கப்படுவர். இத்திட்டங்களுக்கான காப்பீட்டுக் கட்டணம் மற்றும் திட்டப் பயன்களின் விவரம் பின்வருமாறு:

காப்பீட்டுக் கட்டண அமைப்பு

பங்களிப்பு	வருடாந்திர காப்பீட்டு கட்டணம் (ரூபாயில்)
பங்களிப்பு	பிரதான் மந்திரி ஜீவன் ஜோதி பீமா யோஜனா	பிரதான் மந்திரி சுரக்‌ஷா பீமா யோஜனா	மொத்தம்
ஒன்றிய அரசின் பங்கு	150/-	12/-	162/-
தமிழக அரசின் பங்கு (நெசவாளர் சார்பாக)	80/-	-	80/-
இந்திய ஆயுள் காப்பீட்டு கழகத்தின் பங்கு	100/-	-	100/-
மொத்தம்	330/-	12/-	342/-

இத்திட்டங்களின் கீழ் நெசவாளர் பங்காக ஆண்டொன்றுக்கு செலுத்தப்பட வேண்டிய காப்பீட்டுக் கட்டணம் ரூ.80/- நெசவாளர்களின் சார்பாக தமிழ்நாடு அரசினால் இந்திய ஆயுள் காப்பீட்டுக் கழகத்திற்கு செலுத்தப்படுகிறது.

திட்டப் பயன்கள்:

பிரதம மந்திரி ஜீவன் ஜோதி பீமா யோஜனா

ஏதேனும் ஒரு காரணத்தினால் நெசவாளர்கள் இறக்க நேரிட்டால், இத்திட்டத்தின் மூலம் ரூ.2,00,000/- காலமான உறுப்பினர்களின் குடும்பத்திற்கு வழங்கப்படுகிறது.

பிரதம மந்திரி சுரக்‌ஷா பீமா யோஜனா

விவரம்	பயன்கள் (ரூபாயில்)
விபத்தினால் ஏற்படும் மரணம்	2,00,000/-
விபத்தினால் ஏற்படும் நிரந்தர முழு ஊனம்	2,00,000/-
விபத்தினால் ஏற்படும் நிரந்தர பகுதி ஊனம்	1,00,000/-

மகாத்மா காந்தி புங்கர் பீமா யோஜனா

51 வயது முதல் 59 வயது வரை உள்ள கூட்டுறவு அமைப்பின் கீழ் உறுப்பினர்களாக உள்ள நெசவாளர்கள், கூட்டுறவு அமைப்பு சாரா நெசவாளர்கள் மற்றும் உபதொழில் புரிபவர்கள் மகாத்மா காந்தி புங்கர் பீமா யோஜனா திட்டத்தின் கீழ் உறுப்பினர்களாக சேர்க்கப்படுவர். இத்திட்டங்களுக்கான காப்பீட்டுக் கட்டணம் மற்றும் திட்டப் பயன்களின் விவரம் பின்வருமாறு:

பங்களிப்பு	காப்பீட்டு கட்டணம் (ரூபாயில்)
ஒன்றிய அரசின் பங்கு	290/-
தமிழக அரசின் பங்கு (நெசவாளர் சார்பாக)	80/-
இந்திய ஆயுள் காப்பீட்டு கழகத்தின் பங்கு	100/-
மொத்தம்	470/-

இத்திட்டத்தின் கீழ் நெசவாளர் பங்காக ஆண்டொன்றுக்கு செலுத்தப்பட வேண்டிய காப்பீட்டுக் கட்டணம் ரூ.80/- நெசவாளர்களின் சார்பாக தமிழ்நாடு அரசினால் இந்திய ஆயுள் காப்பீட்டுக் கழகத்திற்கு செலுத்தப்படுகிறது,

விவரம்	மகாத்மா காந்தி புங்கர் பீமா யோஜனா பயன்கள் (ரூபாயில்)
விபத்தினால் ஏற்படும் மரணம்	1,50,000/-
இயற்கை மரணம்	60,000/-
விபத்தினால் ஏற்படும் நிரந்தர ஊனம்	1,50,000/-
விபத்தினால் ஏற்படும் பகுதி ஊனம்	75,000/-

2020 - 21 ஆம் ஆண்டில், இந்திய ஆயுள் காப்பீட்டுக் கழகத்தால், 277 இறப்பு கோரிக்கைகள் தீர்வு செய்யப்பட்டு பயனாளிகளுக்கு ரூ.2.37 கோடி காப்பீட்டுத் தொகை வழங்கப்பட்டுள்ளது.

2021-22 ஆம் ஆண்டிற்கான வரவு செலவு திட்ட மதிப்பீட்டில் ரூ. 85.01 இலட்சம் ஒதுக்கீடு செய்யப்பட்டுள்ளது.

கைத்தறி நெசவாளர்களுக்கான நல்வாழ்வு காப்பீட்டுத் திட்டம்

தமிழக அரசால் செயல்படுத்தப்பட்டுள்ள "முதலமைச்சரின் விரிவான மருத்துவ காப்பீட்டுத் திட்டம்" தற்போது பிரதம மந்திரி ஜன் ஆரோக்ய யோஜனா (AB-PMJAY) திட்டத்துடன் இணைக்கப்பட்டுள்ளது. இந்த ஒருங்கிணைந்த மருத்துவ காப்பீட்டுத் திட்டத்தில் ஒரு குடும்பத்திற்கு ஆண்டொன்றுக்கு ரூ.5.00 இலட்சம் வரை மருத்துவ சிகிச்சைகள் பெற்றுக் கொள்ள வழிவகை செய்யப்பட்டுள்ளது. கைத்தறி நெசவாளர்களை இந்த ஒருங்கிணைந்த மருத்துவ காப்பீட்டு திட்டத்தில் சேர்க்க உரிய நடவடிக்கைகள் தமிழக அரசால் மேற்கொள்ளப்பட்டுள்ளது.

அவ்வாறே, தமிழக அரசின் முதலமைச்சரின் விரிவான மருத்துவ காப்பீட்டுத் திட்டத்தில் 66,539 நெசவாளர் குடும்பங்களை சேர்ப்பதற்கு தேவையான நடவடிக்கைகள் மேற்கொள்ளப் பட்டுள்ளது. மேற்படி திட்டத்தின்கீழ் 31.03.2021 வரையில் 47,386 கைத்தறி நெசவாளர்கள் சேர்க்கப்பட்டு பயனடைந்துள்ளனர்.
நெசவாளர் முத்ரா திட்டம்

கைத்தறி துறைக்கு சலுகைகளுடன் கூடிய கடன்கள் வழங்கும் பொருட்டு தேசிய கைத்தறி வளர்ச்சி திட்டத்தின் ஒரு அங்கமாக ஒன்றிய அரசால் "நெசவாளர் முத்ரா திட்டம்" 2016-17 ஆம் ஆண்டு முதல் செயல்படுத்தப்பட்டு வருகிறது. இத்திட்டத்தின் மூலமாக அனைத்து நெசவாளர்கள் மற்றும் உபதொழில் புரிவோரின் நெசவு மற்றும் அதனை சார்ந்த தொழில்களை மேற்கொள்ள தேவையான நடைமுறை மூலதனத்திற்கும், கருவிகள் மற்றும் உபகரணங்கள் கொள்முதல் செய்வதற்கும், தேசியமயமாக்கப்பட்ட வங்கிகள் மூலமாக குறைந்தபட்சம் ஒரு பருத்தி இரக தறிக்கு ரூ.50,000/- வீதமும் மற்றும் ஒரு பட்டு இரக தறிக்கு ரூ.1,00,000/- வீதமும் முத்ரா கடன் தொகையானது வருடத்திற்கு 6 விழுக்காடு வட்டி விகிதத்தில் வழங்கப்பட்டு வருகிறது.

இத்திட்டத்தின் மூலமாக வழங்கப்படும் கடன் தொகையில் 20 விழுக்காடு, அதிகபட்சமாக ரூ.10,000/-க்கு உட்பட்டு பயனாளிகளுக்கு விளிம்புத்தொகை மானியமாகவும் மற்றும் வங்கிகளால் விதிக்கப்படும் வட்டி விகிதத்திற்கும், பயனாளிகள் செலுத்தும் 6 விழுக்காடு வட்டிக்கும் உள்ள வித்தியாச வட்டியில், 7 விழுக்காட்டிற்கு மிகாமல் சம்பந்தப்பட்ட வங்கிகளுக்கு ஒன்றிய அரசு வட்டி மானியமாக வழங்குகிறது. இத்திட்டத்தின்கீழ், 2020-21 ஆம் ஆண்டில் 14,545 விண்ணப்பங்களுக்கு ரூ.70.15 கோடி முத்ரா கடன்கள் வங்கிகளால் வழங்கப்பட்டுள்ளது.

2021-22 ஆம் ஆண்டிற்கு 15,000 கைத்தறி நெசவாளர்களுக்கு முத்ரா கடன் வழங்க குறியீடு நிர்ணயிக்கப்பட்டுள்ளது.

வளர்ச்சித் திட்டங்கள்

தேசிய கைத்தறி வளர்ச்சித் திட்டம்

குழும வளர்ச்சித் திட்டம்

2017-18 முதல் 2020-21 வரையிலான ஆண்டுகளுக்கு தேசிய கைத்தறி வளர்ச்சித் திட்டத்தினை செயல்படுத்த ஒன்றிய அரசினால் திருத்தி அமைக்கப்பட்ட வழிகாட்டுதல்களின்படி, கூட்டுறவு சார்ந்த மற்றும் சாராத கைத்தறி நெசவாளர்களின் நலனுக்காக தமிழக அரசு குழும வளர்ச்சித் திட்டத்தினை செயல்படுத்தி வருகிறது.

ஒரு வட்டார நிலை கைத்தறி குழுமத்தை அமைக்க அதிகபட்ச நிதியாக ரூ.200.00 இலட்சம் கீழ்க்குறிப்பிட்டுள்ள 7 இனங்களுக்கு வழங்கப்படுகிறது.

வ. எண்	இனம்	நிதியுதவி (ரூபாய் இலட்சத்தில்)
1	தொழில்நுட்ப மேம்பாடு	85.00
2	பொது சேவை மையத்துடன் கூடிய பொது வசதி மையம்	50.00
3	திறன் மேம்பாடு	20.00
4	வடிவமைப்பாளரை நியமித்தல்	15.00
5	திட்ட மேலாண்மை செலவு	15.00
6	நூல் கிடங்கிற்கான திரண்ட தொகுப்பு நிதி	5.00
7	உற்பத்தி மேம்பாடு மற்றும் கணினி உதவியுடன் ஜவுளி வடிவமைப்பு (CATD)	10.00
மொத்தம்		200.00

மேலும், கழிவுநீர் சுத்திகரிப்பு ஆலையுடன் கூடிய மாவட்ட அளவிலான சாயச்சாலை அமைப்பதற்கு ரூ.50.00 இலட்சம் வழங்கப்படுகிறது.

மேற்கண்ட 7 இனங்களில், தொழில்நுட்ப மேம்பாடு இனத்திற்கு ஒன்றிய அரசின் பங்காக 90 விழுக்காடும் 10 விழுக்காடு பயனாளிகளாலும் அளிக்கப்படுகிறது. மீதமுள்ள இனங்களான திறன் மேம்பாடு, வடிவமைப்பாளரை நியமித்தல், திட்ட மேலாண்மை செலவு, உற்பத்தி மேம்பாடு, கணினி உதவியுடன் ஜவுளி வடிவமைப்பு (CATD), அடிப்படை ஆய்வு, ஆவணபடுத்துதல் ஆகியவற்றிற்கு ஒன்றிய அரசு நிதியிலிருந்து 100 விழுக்காடு தொகை வழங்கப்படுகிறது.

தமிழ்நாட்டில் 52 வட்டார நிலை கைத்தறி குழுமங்கள் ரூ.56.24 கோடி செலவில் செயல்படுத்தப்பட்டுள்ளது. இதன் மூலம் 35,293 கைத்தறி நெசவாளர்கள் பயனடைந்துள்ளனர்.

குழும வளர்ச்சித் திட்டத்தினை செயல்படுத்த 2021-22 ஆம் ஆண்டுக்கான திருத்த வரவு செலவு திட்ட மதிப்பீட்டில் ரூ.50.00 இலட்சம் ஒதுக்கீடு செய்யப்பட்டுள்ளது.

விற்பனை ஊக்குவிப்பு திட்டம்

விற்பனை ஊக்குவிப்புத் திட்டம் தேசிய கைத்தறி வளர்ச்சித் திட்டத்தின் ஒரு அங்கமாகும். இத்திட்டத்தின் கீழ், கைத்தறி நிறுவனங்களால் தயாரிக்கப்படும் கைத்தறி இரகங்களை சந்தைப்படுத்த நிதி உதவி அளிக்கப்படுகிறது. இத்திட்டத்திற்கான நிதி, ஒன்றிய அரசு மற்றும் மாநில அரசால் 50 : 50 என்ற விகிதத்தில் பகிர்ந்தளிக்கப்படுகிறது.

ஒன்றிய அரசின் வழிகாட்டுதலின்படி, 2017-18 ஆம் ஆண்டு முதல் ஆண்டொன்றுக்கு ரூ.30.00 இலட்சம் வரை விற்பனை மேற்கொண்ட கைத்தறி நெசவாளர் கூட்டுறவுச் சங்கங்கள் மட்டுமே நிதி உதவி பெற தகுதி உடையவை ஆகும்.
கைத்தறித் துணிகளை சந்தைப்படுத்துவதற்கான நிதியுதவி

ஒன்றிய அரசின் தேசிய கைத்தறி வளர்ச்சித் திட்டத்தின் கீழ் தேசிய அளவிலான கைத்தறி கண்காட்சிகள், சிறப்பு கைத்தறி கண்காட்சிகள், மாவட்ட அளவிலான கண்காட்சிகளுக்கு நிதியுதவி வழங்கப்படுகிறது.
பொதுக் கழிவு நீர் சுத்திகரிப்பு நிலையம், திருப்பூர்

திருப்பூர் மாவட்டம், நாட்டின் ஜவுளி பதனிடுதல் மற்றும் பின்னலாடை தொழிலின் மையமாக உள்ளது. நாட்டின் ஆயத்த ஆடை ஏற்றுமதியில் இம்மாவட்டம் முக்கிய பங்கு வகிப்பதோடு, ஐந்து இலட்சத்திற்கும் அதிகமான நபர்களுக்கு வேலைவாய்ப்பையும் வழங்கி வருகிறது. ஜவுளி பதனிடும் ஆலைகளிலிருந்து வெளியேற்றப்படும் சாயக் கழிவு நீரினை சுத்திகரிக்கும் பொருட்டு திருப்பூரில் 18 பொது கழிவு நீர் சுத்திகரிப்பு நிலையங்கள் நிறுவப்பட்டுள்ளன.
ஒருங்கிணைந்த பதனிடுதல் மேம்பாட்டுத் திட்டம்

நாமக்கல், ஈரோடு, சேலம் மற்றும் கரூர் மாவட்டத்தில் உள்ள சிறு, குறு மற்றும் நடுத்தரஅளவிலான ஜவுளி சாயச் சலவை மற்றும் அதன் உபதொழில் நிறுவனங்களை புனரமைக்க இத்திட்டம் 2014-ஆம் ஆண்டு முதல் செயலாக்கத்தில் உள்ளது.
ஒருங்கிணைந்த ஜவுளிப் பூங்கா திட்டம்

ஜவுளித்தொழிலின் வளர்ச்சியினைக் கருத்தில் கொண்டு, ஜவுளித்தொழிலில் உலகத்தரத்துடன் கூடிய உட்கட்டமைப்பு வசதிகளை ஒரே இடத்தில் ஏற்படுத்தும் வகையில் ’’ஒருங்கிணைந்த ஜவுளிப் பூங்கா திட்டம்’’ என்ற திட்டத்தினை 2005-ஆம் ஆண்டு ஒன்றிய அரசு அறிமுகப்படுத்தியது. இத்திட்டம் உலகத் தரத்துடன் கூடிய புதிய ஜவுளிப் பூங்காக்களை வளர்ச்சியடையக் கூடிய மையங்களில் அமைத்து வருகிறது.

இத்திட்டமானது பொது-தனியார் பங்களிப்பு முறையில் செயல்படுத்தப்படுகிறது. திட்டத் தொகையில் 40 விழுக்காடு அல்லது ரூ.40.00 கோடிக்கு மிகாமல் ஒன்றிய அரசு மானியமாக வழங்குகிறது. இதற்கு தமிழ்நாடு அரசு 9 விழுக்காடு அல்லது ரூ.9.00 கோடிக்கு மிகாமல் மானியம் வழங்கி வருகிறது.

நூற்பு, நெசவு (கைத்தறி மற்றும் விசைத்தறி) பதனிடுதல், பின்னலாடை மற்றும் ஆயத்த ஆடை, வீட்டு உபயோகத்திற்கான ஜவுளிகள் மற்றும் ஜவுளி பொறியியல், உதிரி பாகங்களை உருவாக்குதல் மற்றும் கட்டுதல் உள்ளடக்கிய தொழில்நுட்ப ஜவுளிகள் போன்ற அனைத்து ஜவுளித்தொழிலின் துணை பிரிவுகளின் உற்பத்தி மற்றும் அதனைச் சார்ந்த செயல்களை ஜவுளி பூங்காக்கள் உள்ளடக்கி உள்ளது.

ஒருங்கிணைந்த ஜவுளிப் பூங்கா திட்டத்தின்கீழ், தமிழ்நாட்டில் 8 ஜவுளிப் பூங்காக்கள் அமைக்க ஒன்றிய அரசு ஒப்புதல் அளித்துள்ளது. அவற்றில் கீழ்க்கண்ட நான்கு பூங்காக்கள் முழுவதுமாக நிறுவப்பட்டு செயல்பாட்டுக்கு வந்துள்ளன.

1) உயர்தொழில்நுட்ப நெசவுப் பூங்கா, பல்லடம், திருப்பூர்.

2) ஒருங்கிணைந்த ஜவுளி பூங்கா, கரூர்.

3) மதுரை ஒருங்கிணைந்த ஜவுளி பூங்கா, வாடிப்பட்டி, மதுரை.

4) உயர்தொழில்நுட்ப நெசவுப் பூங்கா, குமாரப்பாளையம், நாமக்கல்.

எஞ்சிய கீழ்க்கண்ட 4 ஜவுளி பூங்காக்கள் நிறுவும் பணிகள் நடைபெற்று வருகின்றன.

1) கில்ட் ஒருங்கிணைந்த ஜவுளி பூங்கா, செங்கப்பள்ளி, திருப்பூர்.

2) சைமா பதனிடும் பூங்கா, கடலூர்.

3) காஞ்சிபுரம் அறிஞர் அண்ணா கைத்தறி பட்டு பூங்கா, காஞ்சிபுரம்.

4) பல்லவாடா தொழில்நுட்ப நெசவுப் பூங்கா, ஈரோடு.
தொழில்நுட்ப ஜவுளிகள்

ஜவுளித்துறையில் தொழில்நுட்ப ஜவுளிகள் என்பது புதிதாக உதயமாகி வரும் ஒரு பிரிவாகும். இது உள்ளூர் நுகர்வுக்கு மட்டுமின்றி ஏற்றுமதிக்கும் நிறைய வாய்ப்புகளை ஏற்படுத்தி உள்ளது.

தொழில்நுட்ப ஜவுளிகள் கீழ்க்கண்ட 12 பயன்பாட்டு பகுதிகளை மையமாகக் கொண்டுள்ளது. விவசாயம் சார்ந்த தொழில்நுட்பம் (Agrotech), கட்டிடம் சார்ந்த தொழில்நுட்பம் (Buildtech), துணி சார்ந்த தொழில்நுட்பம் (Clothtech), புவிசார்ந்த தொழில்நுட்பம் (Geotech), வீட்டுத்தேவை சார்ந்த தொழில்நுட்பம் (Hometech), தொழில்சார்ந்த தொழில்நுட்பம் (Indutech), மருத்துவம் சார்ந்த தொழில்நுட்பம் (Meditech), வாகனம் சார்ந்த தொழில்நுட்பம் (Mobiletech), சுற்றுப்புறச்சூழல் சார்ந்த தொழில்நுட்பம் (Oekotech), பேக்கேஜிங் சார்ந்த தொழில்நுட்பம் (Packtech), பாதுகாப்பு சார்ந்த தொழில்நுட்பம் (Protech) மற்றும் விளையாட்டு சார்ந்த தொழில்நுட்பம் (Sporttech).

தமிழ்நாட்டில் தொழில்நுட்ப ஜவுளி வளர்ச்சி பெறும் பொருட்டு, "தமிழ்நாடு புதிய ஒருங்கிணைந்த ஜவுளி கொள்கை 2019" இல் தொழில்நுட்ப ஜவுளி மேம்பாட்டிற்கு பின்வரும் சலுகைகள் அறிவிக்கப்பட்டுள்ளன.

1) ஒருங்கிணைந்த ஜவுளிப் பூங்கா திட்டத்தின் (SITP) கீழ், தொழில்நுட்ப ஜவுளிப் பூங்காக்கள் அமைப்பதற்காக திட்ட மதிப்பீட்டில் 9 விழுக்காடு, அதிகபட்சமாக ரூ.9 கோடிக்கு மிகாமல் மாநில அரசு மானியம்.

2) தொழில்நுட்ப ஜவுளித் திட்டங்களுக்கு ஒன்றிய அரசிடமிருந்து கிடைக்கும் பிற சலுகைகளுடன் கூடுதலாக மாநில அரசின் 6 விழுக்காடு வட்டி மானியம்.

3) தொழில்நுட்ப ஜவுளி சந்தைகள் மற்றும் தயாரிப்புகளின் சாத்தியக்கூறுகளை அறிந்து கொள்ள வெளிநாட்டில் ஆய்வு நடத்துதல்.

4) தொழில்நுட்ப ஜவுளி திட்டங்களுக்கு 100 விழுக்காடு முத்திரை கட்டண விலக்கு.
சமர்த் திட்டம்

ஒன்றிய ஜவுளி அமைச்சகத்தால் ஜவுளித்துறையில் திறன் மேம்பாட்டு பயிற்சி அளிக்கும் பொருட்டு சமர்த் திட்டம் அறிமுகப்படுத்தப்பட்டுள்ளது. தமிழ்நாடு அரசினால், கைத்தறி மற்றும் துணிநூல் துறையின் கட்டுப்பாட்டில் செயல்பட்டுவரும் 4 பயிற்சி நிலையங்களில் கைத்தறி நெசவு தொடர்பாக ரூ.196.14 இலட்சம் திட்ட மதிப்பீட்டில் 1400 பயனாளிகளுக்கு பயிற்சி அளித்திட ஒன்றிய அரசின் ஒப்புதல் பெறப்பட்டுள்ளது.

பிரதம மந்திரி ஜீவன் ஜோதி பீமா யோஜனா, பிரதம மந்திரி சுரக்‌ஷா பீமா யோஜனா

திட்டப் பயன்கள்:

எங்களை பற்றி

இணைப்பு

இணைப்பு

கைத்தறி துறை நிறுவனம்